Jer 6 | NdeIBE | STEP | “Balekani ukuze liphephe, bantu bakoBhenjamini! Balekani eJerusalema! Tshayani icilongo eThekowa! Phakamisani uphawu phezu kweBethi Hakheremi. Ngoba umonakalo uyabonakala ngasenyakatho, kanye lencithakalo eyesabekayo.

Jeremiah 6

IJerusalema Livinjezelwe

1 “Balekani ukuze liphephe, bantu bakoBhenjamini! Balekani eJerusalema! Tshayani icilongo eThekowa! Phakamisani uphawu phezu kweBethi Hakheremi. Ngoba umonakalo uyabonakala ngasenyakatho, kanye lencithakalo eyesabekayo.

2 Indodakazi yaseZiyoni enhle kangaka lebucayi ngizayibhubhisa.

3 Abelusi lemihlambi yabo bazakuza bamelane layo; bazamisa amathente abo eyihanqile, lowo lalowo elinde indawo yakhe.”

4 “Lungelani ukulwa layo! Vukani, kasihlaseleni emini! Kodwa, habe, ukukhanya sekufiphala, lamathunzi okuhlwa asesiba made.

5 Ngakho vukani, kasihlaseleni ebusuku sidilize izinqaba zayo!”

6 UJehova uSomandla uthi: “Gamulani izihlahla liziwise lakhe imiduli yokuvimbezela iJerusalema. Idolobho leli kumele lijeziswe; ligcwele ukucindezela.

7 Njengomthombo ugobhoza amanzi awo, ngokunjalo lalo ligobhoza ububi balo. Udlakela lokubhubhisa kuyezwakala phakathi kwalo; umkhuhlane walo lamanxeba ngihlezi ngikukhangele.

8 Xwayiseka, we Jerusalema, hlezi ngikutshiye, lelizwe lakho ngilichithe, kungabi lomuntu ohlala kulo.”

9 UJehova uSomandla uthi: “Kababuthe izinsalela zako-Israyeli ngokupheleleyo njengevini; dlulisa isandla sakho phezu kwezingatsha futhi, njengomuntu ovuna amavini.”

10 Ngubani engingakhuluma laye ngimxwayise na? Ngubani ozangilalela na? Izindlebe zabo zivalekile ngakho bangeke bezwe. Ilizwi likaJehova liyisinengiso kubo. Kabafumani ntokozo kulo.

11 Kodwa mina ngiyafuthelana ngolaka lukaJehova, ngingeke ngibe ngisalugodla ngaphakathi. “Lwehlisele phezu kwabantwana emgwaqweni laphezu kwamajaha abuthene ndawonye; bobabili indoda lomkayo luzabehlela, kanye labadala, labo abakhulelwa yiminyaka.

12 Izindlu zabo zizanikwa abanye, konke lamasimu abo kanye labafazi babo, lapho ngiselula isandla sami ngimelana lalabo abahlala elizweni,” kutsho uJehova.

13 “Kusukela kwabancane kusiya kwabakhulu, bonke bayizihwaba ezifuna inzuzo; banjalo labaphrofethi kanye labaphristi, bonke benza inkohliso.

14 Babopha inxeba labantu bami kungathi kalilibi kakhulu. Bathi, “Ukuthula, ukuthula.” khona ukuthula kungekho.

15 Bayayangeka na ngokuziphatha kwabo okwenyanyekayo? Hatshi, bavele kabalazo izinhloni lokuyangeka kabakwazi. Ngakho bazawela phakathi kwabawileyo; bazakwehliselwa phansi lapho sengibajezisa,” kutsho uJehova.

16 UJehova uthi: “Manini emahlanganweni emigwaqo likhangele; libuze izindledlana ezindala, libuze lapho okulendlela enhle khona, lihambe ngayo, lizathola ukuphumula kwemiphefumulo yenu. Kodwa lina lithe, ‘Kasiyikuhamba ngayo.’

17 Ngalibekela abantu bokulilinda ngathi, ‘Lalelani ukukhala kwecilongo!’ Kodwa lina lathi, ‘Kasiyikulalela’

18 Ngakho zwanini, lina zizwe, khangelani, lina bafakazi, libone okuzakwenzakala kubo.

19 Zwana, wena mhlaba: ngiletha umonakalo phezu kwabantu laba, izithelo zamaqhinga abo, ngoba kabawalalelanga amazwi ami njalo bawalile lomthetho wami.

20 Ngilani lempepha yaseSheba loba imfe evela elizweni elikude na? Iminikelo yenu yokutshiswa kayamukeleki; imihlatshelo yenu kayingithokozisi.”

21 Ngakho uJehova uthi: “Ngizabeka izivimbelo phambi kwalababantu. Oyise lamadodana bazakhubeka kuzo; omakhelwane labangane bazabhubha.”

22 UJehova uthi: “Khangelani, ibutho liyeza livela elizweni lasenyakatho; isizwe esikhulu siyanyakaziswa sivela emikhawulweni yomhlaba.

23 Bahlome ngamadandili langemikhonto; balesihluku kabalaso isihawu. Bezwakala njengokuhlokoma kolwandle lapho begade amabhiza abo; beza njengabantu abalungele impi ukuba bakuhlasele, wena Ndodakazi yaseZiyoni.”

24 Sesizwe imibiko ngabo, njalo izandla zethu kazilamandla. Usizi lusiphethe, ubuhlungu obufana lobowesifazana ehelelwa.

25 Lingayi phandle egangeni, loba lihambe emigwaqweni, ngoba isitha silenkemba, njalo silencithakalo emaceleni wonke.

26 Awu bantu bami, gqokani amasaka, lizibhuqe emlotheni; khalani lilile kabuhlungu njengokwendodana eyiyo yodwa, ngoba masinyane nje umchithi uzafika kithi.

27 “Ngikwenze umhloli wezinsimbi labantu bami babayilitshe elixubene lensimbi ukuba ukhangele ubone ube usuhlola izindlela zabo.

28 Bonke bangabahlamuki abalukhuni, abahamba behleba. Balithusi lensimbi; bonke benza ukuxhwala.

29 Imvutho ivutha okwesabekayo ukususa umnusu ngokutshisa komlilo kodwa ukucenga kuqhubeka kuyize; ababi kabakhutshwanga.

30 Kuthiwa bayisiliva esilahliweyo, ngoba uJehova usebalahlile.”